http://www.kitabat.com/i8511.htm

 28  أيـــلول  5200

سني في مدينة الصدر، نص حرفي لدردشة سريعة

كتابات - شلش العراقي

 

• السني مخاطبا جاره الشيعي في الطريق: تدري وكيل الغذائية اليوم استفزني

• الشيعي : شلون؟

• السني: كلي صدك أنت سني؟

• الشيعي :هو شعليه!!

• السني: والله ما ادري بكلشي حاط روحه ,هسة احنا غير منريد نحجي شجان يسوي ايام..

• الشيعي :بس أنت الله يسلمك ماتنعرف لاسني ولاشيعي

• السني:أخوية ماكو فرق أني أهلي سنة وابني الجبير متزوج شيعية ومرتي  موكدامك أول العام طبخت للحسين

• الشيعي: صح مـ ـ ـ اكو فرق بـــ ــــ ـس..

• السني: يعني شنو بس..,(رافعا صوته قليلا) صدك ماكو فرق, واني لو أصلي وإنشاء الله  راح أصلي اذكر الإمام علي بصلاتي

• الشيعي:لا بروح أبوك معقولة؟!!

• السني:طبعا قابل ألزرقاوي اشرف من الإمام علي؟!!

• الشيعي: زين وعمر؟

• السني:(بقليل من الحشرجة)بابا علي سيف الله المسلول

• الشيعي:وأبا بكر ؟!

• السني: أبو بكر منو؟ أصلا لو ما الغار الخش بيه ويه محمد ما جان احد عرفه..بابا علي كرم الله وجهه ..

• الشيعي: ها شني شو ردينة, كرم الله وجهه شنو؟ كول عليه السلام

• السني: كرم الله وجهة بالقرآن موجودة

• الشيعي:هسة احنا ياهو مالتنة بالقران بعد  عيني عينه

• السني: صحيح عليه السلام أحسن شوية

• الشيعي :شني رأيك بمغتدى(خافضا صوته مع التفافة خاطفة للخلف)

• السني :اوو هذا بطل على أبو وجده  هذا كل الخير بيه

• الشيعي ) بنفس التون)بس هو خارج عن أمر المرجعية

• السني :أي صحيح هو زعطوط شوية

• الشيعي: صوتك لا تعم علينا

• السني:   المفروض يباوع لحلك إبراهيم السيستاني لان هذا مثل عمه

• الشيعي : سيد علي السيستاني بوية.  إبراهيم ياهو ؟

• السني :اعذرني اني اخلط بالأسماء

• الشيعي: (وصل باب بيته) تفضل أبو..

• السني: زاد فضلك, حاثا الخطى باتجاه بيته القريب(لنفسه)  ياجعفري ياسيستاني ياحكيم يابطيخ  كلهم شروك جمالة اروح اضرب  نص عرك وانام هاي متخلص وياهم)

 

Shalash70@hotmail.com