http://www.kitabat.com/i11462.htm
24 كانون اول 5200
بيت وخمس بيبان ....
كتابات - شلش
العراقي
على السيد
ابراهيم الجعفري رئيس وزراء العراق ، متابعة نشرات الاخبار جيدا ، ليعرف منو راح
ومنو اجه ،لان العراق صار خان جغان وياهو اليجي كام يطب وحضرته ميدري ، ترى
عيب انفضحنا ، هو بلد لو سوك مريدي . توني بلير بالبصرة ورامسفيلد بالفلوجة وديك
تشيني بالمنطقة الخضراء والجعفري نايم ورجليه بالشمس .خاف احجي حجاية جبيرة
ويزعلون علي الجماعة ، اخوان البيوت لها حرمات والمايدري منو يطب ويطلع في بيته
هذا مؤكد راح تطلعله ( كَرون). مو هيج ام علي لو لا ؟
خليل
زلماي يرسل في طلب الجعفري في السفارة الامريكية وصاحبنا يروح يركض ويتفاجأ
بوجود ديك تشيني. وبلير طب وطلع للبصرة حتى ماكال السلام عليكم ، ورامسفيلد
يفتّر بالعراق تكَول بيت الخلفوه .هذا من عدا السواح المصرح لهم بالدخول لانعاش
الدينار العراقي بالتومان الايراني .
بالله السيد
الجعفري نكول مطفي ، صولاغ شبيه ؟ مو يكَول اني ضابطها .والنملة اذا تعطس بزاخو
اسمعها ، لعد شو رؤساء دول عظمى طابين منا طالعين منا وهو نايم . لا، ترى
هاي مهزلة .حتى (الكمالية) الله يذكرها بالخير ما جانت هيج .
ولو الرجال
بلير خابرني شخصيا ، وكلي مستر شلش ، ترى راح اجي للبصرة خو ما عندك مانع .بكل ادب
ووقار جاوبته وكتله ( يو ار ولكم هير مستر بلير ات از يور هاوس )، ، لامو بس
هاي ، غنيتله (راح للبصرة ولبسنا ) .
المشكلة
الاخرى ان السيد الاشيقر الاحيمر الجعفري حتى اخبار ميشوف ، لان الاخ فتح فضائية
على باب الله وسماها (بلادي) ، وهاي القناة مثل المراية كاعد كبالها ويشوف بس
اخباره .شنو القناة العراقية مقصرة وياك ؟ لو مثل ابو عداي متشبعون صور .جوعية مال
تلفزيونات.
بمناسبة
مسيرة اليوم الحاشدة والتي انطلقت ضد نتائج الانتخابات الاولية ، اقول
لاخواني متابعي قناة الشرقية في كل مكان ، ان المسيرة باطلة وتافهة ، ، ومع
احترامي للمشاركين فيها اقول انها مسيرة غبية .وهذا لايعني ان الانتخابات ليست
مزورة .
المسيرة
باطلة لان الداعين اليها كانوا يعرفون جيدا ان الانتخابات مزورة وشاركوا فيها .
والا ماذا نسمي انتخابات يقتل فيها المتنافسون ويغتال فيها حتى من يعلق ملصقا
انتخابيا .لماذا قبلوا التحدي وهم يدركون ان خصومهم يمسكون البنادق بيد والقران
الكريم بيد اخرى ، ليحلفوا الناخب المسكين الذي احتار بين نار التهديد ونار الوعيد
ونار وقودها الناخبين والحجارة.
اما بخصوص
مسيرة مدينة االثورة التي مرت من شارعنا الظهر، فلاتعليق ، لان شايفها الف مرة .
وللاخوة
مشعلي فتيل الحرب الاهلية اقول لهم ناصحا :ان الحرب لن تقع بين فئات الشعب لاننا
اهل و اخوة ، وانما ستقع بين الميلشيات والاحزاب وهذا امر تنتظره امريكا
بفارغ الصبر لتتخلص من الزعامات والعمامات التي لا ترغب بوجودها .
شفتوا اخوكم
شلش العراقي شلون محلل ستراتيجي يملخ ، بشرفي اني افتهم بس محد يسمع كلامي .
مازلت
بانتظار النتائج النهائية للانتخابات . . .
الى اللقاء