http://shalashaliraqi.blogspot.com/
12 كانون اول 5200
بانزين سياسي مُحَسن
كتابات - شلش
العراقي
ميخالف عمي
صولاغ ممنوع التجول على عيني وراسي ،راح نكعد بالبيت اسبوع .هاي موجديدة علينا
،راح نكابل التلفزيون ،بس شوية تديرون بالكم علينا بالكهرباء ،مو مشكلة نكعد
بالبيت. غير هي هاي الخطة الامنية العبقرية مالتكم . راح ننجب ونكعد ، واني شخصيا
اواعدك ما اطلع راسي حتى من الرازونة . اسبوع غير؟ ابسط منها ماكو . بس بشرط عمي
صولاغ ، ورا هذا الاسبوع ما اريد اشوفك. ممكن ما اشوفك ، لو طلبي هذا صعب عليك ،هم
تريد تلطش للابد؟هي مو ديمقراطية و من حق اي مواطن ميشوفك .اني شخصيا ما احب
اشوفك .
* خنجر . .
خنجر
* ها شلش..
مشغول لحظة شوية
* لك هاي
شنو البراميل ؟
* بانزين
شلش بانزين
* لك شتسوي
بالبانزين لاعدك سيارة ولامولدة ؟
* بعدين
تعرف . . .
* لك عمي لا
تحركنا ، ترست البيت بانزين
* شلش لتدخل
بالسياسة خليك على كد حالك
* يابا
ياسياسة ، اني اسالك على البانزين منو جاب طار السياسة
* شلش وليدي
هذا بانزين سياسي دير بالك
خنجر طبب
البراميل بالبيت وطلع يشتم بايده ويمسحها من البانزبن بدشداشته ، تقرب مني وكلي
* شلش انت
شوكت تترك السياسة وتنتبه لشغلك. ابني لتدخل نفسك بما لايعنيك
* خنجر اني
شكلت ؟ كتلك هذا البانزين شتسوي بي ، لان انت ماعندك لاسيارة ولا مولدة
* شلش واني
كتلك هذا بانزين سياسي .يعني موشغلك .
* والله ما
افتهمت شنو يعني بانزين سياسي .
* هذا
البانزين هدية من قائمتنا للناخبين الشرفاء
* بس شلون
راح تعرف الشرفاء خنجر
* مبينين
الشرفاء ، همه اللي راح ينتخبون قائمتنا
* واللي
ماراح ينتخبوها خنجر ؟
* ميحصلون
ولا نص كَالون .
* خنجر هاي
انتخابات بانزينية
* لا بوية
مو بس بانزين ،انت ما حصلت مواد تموينية ؟ الناس وزعت معجون وحمص وشكر ومعلبات
وبيض ودبس ومعكرونة واكو مرشحين وزعوا بطانيات وصوبات . حتى لحم غنم وزعوا . انت
نايم؟
* خنجر منو
وزعها ؟
* عمي هواي
شرفاء بالعراق، جانوا ضامين فلوسهم لهذا اليوم
* زين اذا
انتخبت جماعتك تطيني جم كلن بانزين
* شنو جم
كلن ؟ ، عمي الصوت بعشر كَلنات
* خنجر هاي
خوش مبادرة قيمة من قائمتكم
* شلش لازم
نوزع لكل عراقي حصته من النفط ، بس شنسويلكم اذا كل واحد منكم براسة قائمة شكل ،
لو تتوحدون وتنتخبون جماعتنا جان شفتوا الخير ،و جان عادت الثروة النفطية لاصحابها
الحقيقين
* خنجر هاي
موديمقراطية ، العراقي بعشر كَلنات هاي اهانة.
* خلي
مولدتك تكوم ترتر وتعال احجي بالديمقراطية والاهانة
* خنجر
بشرفي بس انت تعرف تعيش بهذا الوكت .
* روح شلش
البس ملابسك وتعال وياي اشوفك خيرات الديمقراطية ،لان ورا الانتخابات كلشي متقبض
.محد يباوع بوجهك .تعال ماطول المواطن محترم وصوته مسموع .
غيرت ملابسي
وحطيت ايدي بيد خنجر واخذنا جرخلة على مقرات الاحزاب الدينية والوطنية والتقدمية
والرجعية والعلمانية ورجعنا بحمولة جيدة "مواد غذائية ومشروبات غازية (ميرندا
تحديدا )وجكاير ماركة (كلواز ) ورئيس احد الاحزاب الصغيرة عرفني ورأسا باسني
بوستين قويات وكلي شلش انت صوتك مسموع اخوي همتك ويانة وناوشني بطلين عرك عصرية
بدون مزة وثلج .
رجعنا للبيت
راسا اجت ابالي اغنية( شفت الضوة من بعيد كلت احتركنا ). اخواني الاعزاء احترك بيت
خنجر من جراء البانزين الديمقراطي واحتركت صورة المرشحين بقائمته لان لحاهم سريعة
الاشتعال .وتحول العرس الديمقراطي بشارعنا الى لطمية .