http://www.kitabat.com/i10271.htm
23 تشرين الثاني 5200
مراهقة ثالثة يعيشها الحجي
كتابات - شلش العراقي
"رسمتك من القمر صورة واخذت من النور نوره احبك حبيبي وروحي بيك
مسحورة "
هذه هي الكلمات التي وجدها حجي كاظم بعد خروجه من صلاة المغرب في
صندوق رسائل موبايله الذي اقتناه مؤخرا.. الحجي داخ وافتر عنده الديلكو ..واخذ
يمشي بطيئا وقرأ الرسالة مرات ومرات ، وفكر ان يرد على الرسالة لكنه استعان بالصبر
..
((هاي يمكن الحجية كاعد تجربني ..بس الحجية لا تقرا ولا تكتب وماعدها
تليفون ,لا..هاي يمكن واحد من الجماعة كاعد ينصب عليه، بس منو يسويها ؟ كلهم ناس
عقال ومومال هاي السوالف , منو ياربي منو ؟!!!
وبدل ان يتوجه الى البيت قادته قدماه الى المقهى القريبة من بيته، جلس في
زاوية بعيدة وراح يقرأ الرسالة.
((رسمتك من القمر صورة واخذت من النور نوره ..احبك حبيبي وروحي بيك مسحورة
))
• والله هاي الاوصاف تنبطق علي بالضبط . السالفة هاي مو خالية ، وحدة
حابتني واني ما ادري، مسكينة شلون متلوعة ابو ابوها محترك ، المرة مجيمة واني
مخلصها افصول و فواتح وشكالت العشيرة وشحجت العشيرة .
((رسمتك من القمر صورة واخذت من النور نوره ..احبك حبيبي وروحي بيك
مسحورة))
مع طنين هذه الكلمات براسه ، وصل الحجي الى البيت توجه الى غرفته دون ان
يسلم على الحجية ، تمدد على سريره مقربا المسجل القديم الذي كان يستخدمه لسماع
القرايات والاحاديث الدينية اخرج شريط وحشة القبر واستبدله بشريط ( والله واحشني
موت ) الذي اشتراه في طريقه بشكل سري من محل التسجيلات القريب من المقهى .
راح صوت المطرب ماجد المهندس يصدح في ارجاء الغرفة ، وضع الحجي رجلا
على رجل هازا قدمه اليمنى طربا ..الحجية سمّت بالرحمن واستغفرت ومشت صوب الغرفة
التي تعالت فيها الموسيقى ..
• حجي .. حجي ..حجي كاظم ، يمة الحجي شجا ؟ هزت يديها
وانصرفت باستغراب
اخرج الحجي تلفونه ثانية وقرأ الرسالة من جديد تبّسم وراح يخمن :
• يمكن هاي حميدة مرة المرحوم جبار ، لا..لا يمكن هاي فطيم من طلكها عناد
كامت اتدور منا منا ..حقها مرة حلوة وبعدها موجبيرة كلش..بس منو يكول ..يمكن هاي
سعيدة لا ..لا استغفر الله ،رجلها حجي كامل صاحبي واليوم جان وياي بالجامع
.. استغفر الله ..
تزايدت نشوة الحجي وزاد قلق الحجيّة التي يرفض الرد على نداءاتها
المتكررة..
• حجي .. حجي ..حجي كاظم..يا حجي كاظم ..
قضى الحجي ليلته سهران يعيد ويكرر الاسماء المحتملة من المعجبات .
في الصباح الباكر استيقظ بعد نومة قصيرة..قام الى المراّة وفكر لو انه خلع
العقال وحلق شعره بطريقة مناسبة بعد اعادة صبغه بالاسود الغامق ..
عاد الى النوم متكاسلا وظلت الحجية يمزقها القلق على الحجي الذي عزل نفسه
عنها تماما غير عابيء بوجودها .
استيقظ ثانية تناول فطوره دون ان يكلم الحجية التي اعتزلته في غرفتها لتعيث
بها الشكوك والتكهنات .
• الحجي بعد ان تناول فطوره اخرج التلفون من جيبه وقرأ الرسالة مرة اخرى
وخرج على الفور هائما على وجهه في الطرقات، مشى لا على التعيين وصوت اغنيته
الاثيرة يستعمر راسه ,( والله واحشني موت خاف من بعدك اموت ) ركب سيارة ونزل من
اخرى فتش في الوجوه وزع الابتسامات ، تبادل النظرات ، مع كل من تقع عيناه عليها ،
اشترى عطرا من بائع جوال ، اشترى علبة جل صفراء , اشترى ملقط ، اشترى نيفيا ،
اشترى مجموعة بوسترات ملونة ،عاد الى غرفته ، تمدد على سريره ، قرأ الرسالة مرات
ومرات اخيرا استجمع قواه وقرر الاتصال :
• الو
• الو
• ياهو وياي
• ههههههههه (ضحكة نسائية )
• ياهو انتِ ؟ الله عليج كولي ، ترى اني اعرفج ...
• اني.. اني حميـــــــدة (بغنج ورقة)
• حميدة ؟ !! صدك ؟.. ... وروح ابوي عرفتج
• اممممم
• حميــــــــدة ..(بصوت خافت)
• ها ...
• شلابسه ؟
• هدومي ..
• ههههه
• حميدة ( قالها بحشرجة )
• ها
• ما مشتهية شي (بارتباك)
• اي
• شنو (تسارعت دقات قلب الحجي وكاد صوته ان يغيب )
• بقلاوة
• وبعد ؟
• وبعد مدري شني
• شني (تعرق الحجي )
• ما اكول
• كولـ ــ ــ ــي
• طوط ، طوط ، طوط ( خلص رصيد الحجي ، ثارت اعصابه ،ضرب التلفون بالكاع
وهرع الى الحجية التي اعتزلته في غرفتها وارتمى قبالتها يقبلها بقوة وعنف غابت على
اثرهما الحجية في اغفاءة لذيذة افتقدتها منذ عشرين سنة).