http://www.kitabat.com/i10157.htm

العراق الافغاني يابان الشرق الاوسط

كتابات - شلش العراقي

السفيه ابن السفيه رامسفيلد يكَول العراق متخلف عن افغانستان بسنوات ، بالله هاي شلون اهانة من الصباحيات ،  اخذت الجريدة ودكيت الباب على خنجر تعال بوية خنجر الحكنه ،الامريكان  كالوا راح نسويكم يابان الشرق شو يردون يرجعونا ورا افغانستان بسنوات.

• شلش عبالي مدري شكو ،عدك خبر بيه خير .شعليك بحجي الناس

• يابه  بس هذا رامسفيلد يكَول،  مو عباس البياتي .

• عمي دروح انت ورامسفيلد مالك ،

• خنجر بس هذا كلام خطير، باجر راح يكَولون احنا طورناكم وسويناكم مثل افغانستان .

• اخي حقهم، جربوا يسوون السماوة مثل اليابان ، المحافظ اقترح عليهم نموذج افغانستان

• المحافظ اقترح عليهم ؟

• اي ابني هذا المحافظ من المجلس الاعلى بالنسبة اله افغانستان جنة

• عمي خنجر ، الله يقبل احنا اكثر تخلف من افغانستان ،احنا عدنا علماء اكثر من ملاليهم

• انت متوهم ، عدنا عمايم اكثر من ملاليهم،  افغانستان دولة متطورة ومتقدمة علينا هواي .

• خنجر لتمشي ورا الاعلام ،افغانستان بيش متقدمة  ب(ظروك الفار) لو بالطين خاوة ؟

• شلش اسمع، الافغان بيومين كعدوا واتفقوا ب(اللويا جيركه) وشكلوا برلمان وسووا انتخابات وهمة ميت عرق ومذهب .

• ميت عرق ؟

• اي عيوني ، بشتون واوزبك وطاجيك

• خنجر صدك ذكرتني بالجاجيك ، البارحة شلون كعده .

• هم علكتوها ، هسة يلكفوكم ويسووكم جاجيك

• لا عمي البارحة طك اصبع وهز جتاف ، والشباب طاحو .

• وين ولك طك اصبع ؟

• عمي الناس كلها تلط عرك بس انت خاتل بالبيت

• انت ويامن سكرت البارحة ؟

• الشباب كلهم حتى حاتات اكو .

• لا بروح ابوك  ، حاتات !!

• اي وروح ابوك حاتات ، و دك و ركص و(من زعلك من بجاك .. انعل ابو الي بجاك )

• هاي شني لطمية ؟

• لا اغنية حسام الرسام الجديدة .

• انت مخلصها دك وركص وجايني شكَال  رامسفيلد  وشحجت كوندليزا رايس، بوية شجابك على هاي الكلاوات ، صايرلي سياسي  ابو العرك.

• لا والله بس رامسفيلد ضوجني ، لك العراق متخلف عن افغانستان ، هاي مصايره .

• شنسوي اذا كلمن يجر بصفحه ، الصدر يريد يصير السيد القائد والحكيم هو السيد القائد والضاري يبجي على السيد القائد ، وعبوات ومفخخات واقبية ومعتقلات ومليوصة عمي شرايحلنه مثل افغانستان ،

• هسة بلكي يتفقون بالقاهرة .

• لك انت ماعندك مخ ؟ همة بوطنهم ما اتفقوا ، يتفقون يم فيفي عبدو ، بوية الحل الوحيد يكعدون ببيوتهم .

• شلون يكعدون ببيوتهم ومن يدير البلد ؟

• والله ضحكتني ، ليش همه  كاعد يدرون البلد ؟ شخلوا بالبلد ؟

• والحل ؟

• الحل المعممين يكعدون ويرتاحون ويتركوها للسياسيين المختصين لان الف واربعميت سنة خلافات ماتنفض بفندق بالقاهرة،

• متكلي ليش مختلفين ؟

• مختلفين واحد يريد علي بن ابي طالب اول خليفة والثاني يريد يرجعه تاسع واحد .

• متكَلي باليابان شلون اتفقوا على الخلفاء.

• بوية اليابان من اول متفقين ماعدهم خلافات .

• ليش كلهم سنة ؟

• لا الاكثرية شيعة من اتباع تويوتا ، روح شلش انت مخلصها  سهر وطربكة وجاي اتدوخني .

• خنجر اخر سؤال الله يخليك .

• كول .

• تويوتا شيعي لو سني ؟

• بوية تويوتا بنية افيلية .. بس توشيبا شيعي يقلد ساسوكي..