http://www.kitabat.com/i12635.htm

27  كانون الثاني 6200

الاردن - الاخيرة

كتابات - شلش العراقي

 

اطيب من العراقيين بالعالم ماكو ،هاي مومبالغة ولا عنصرية ولاتحيز ولا اي شي ، اصدقاء ومعارف وجيران وزملاء دراسة لم ار بعضهم منذ سنين طويلة ، ياهو اليلزمني يحضني ويبوسني ويعزمني وكانني نازل ببرشوت من السماء .

ماكو اطيب من العراقيين والي ميعجبه هذا الكلام خل يشرب من البحر الميت ، والله صارلي ثلث ايام ماعرف طريقي منين ، ياهو اليسمع بي جاي اجاني يركض ، اني اعرف ظروفهم بس شسوي مصرين على الكرم والضيافة ،

باجر راح اودعكم ودموعي تسبقني ، كيف يودع الانسان مثلكم ، ها انتم في قلب الغربة وتطردون الوحشة عن خطاركم ،

حقها الدنيا تحسدنا ، موعلى النفط ، ولاعلى النهرين ، ولاعلى النخيل  ، ولاعلى جبالنا الخضراء ، لا احنا محسودين على طيبتنا ومحبتنا وحنانا وعطفنا ،محسودين على كلوبنا البيضة ، محسودين على وعينا وذكائنا واخلاصنا واجتهادنا ، محسودين على كلشي ، بس للاسف عدنا سياسيين حثالات الدنيا ،اصلا ماعدنا سياسيين ، عدنا لصوص ودجالين ومشعوذين وتجار دسائس وخطب واكاذيب ،

هاي بيدي مجلة شهرية  انيقة تصدرها امانة عمان الكبرى ، شوفوها شكد انيقة وحلوة ، وتتحدث عن العاصمة عمان وبرامجها وخططها وفعالياتها ، عمان الكبرى عدها مجلة انيقة وبالعافية على عمان الكبرى ، بس ليش بغداد الصغرى مظلومة ، وفوك قهر الله عدنا مجلس امانة بغداد هم مجرد مجموعة ثيران بليدة ، راح واحد  منكم يكلي ليش شلش  شو رجعت على امانة بغداد ، اني اكلكم ليش  اخوان ، هذا مجلس امانة بغداد  الموقر بعد ان انتهى من اطلاق اسبوع البيئة واسبوع الشجرة ويوم العصافير ويوم الفراشات  ويوم النخلة ويوم وردة الجوري ومسابقة اجمل وردة رازقي ،وبعد انتهى من تقديم كل واجباته وصارت بغداد جنة حقيقية  ، تدرون مجلس امانة بغداد شسوى ، سوى مبادرة عالمية عملاقة وغير مسبوقة ، وهي جعل يوم الغدير عطلة رسمية ،لان احنا عايزين عطل وطنية ، يابا ليش يوم  الغدير عطلة رسمية ، لان النبي عليه الصلاة والسلام  وبعد حجة الوداع وفي طريق عودته الى المدينة ، جلس على غدير( خم) واوصى بالولاية للامام علي عليه السلام ،والصحابة رضي الله عنهم وارضاهم ، شوية ما نفذوا الاوامر بصورة صحيحة وخربطوا تسلسل الخلافة ، فمجلس محافظة بغداد بعد الف وخمسميت سنة يريد اعادة الحق الى نصابه حتى لو كان هذا الحق على اكوام مزابل وقمامات بغداد وطفحان مجاريها وتحولها الى  مايشبه زريبة حيوانات في وسط جمهورية راوندا .

الامام على (ع ) شخصيا حكم الكوفة اربع سنوات وتسعة اشهرو ثلاثة ايام  لتصبح عاصمة الدولة الاسلامية لم يجعل  عليه السلام من الغدير يوما وطنيا لابناء الكوفة الكرام  الذين ضاق بهم ذرعا ونعتهم باوصاف نخجل من روايتها والحديث عنها .

بدل متحتفلون بيوم الغدير وهو يوم مبارك بلا شك ، ارجوكم يامجلس خيانة العاصمة  زوروا حي الغدير في بغداد اذا سامعين بحي الغدير او  تندلون حي الغدير، وشوفوا المطر شسوى باهلها والمجاري شلون  طكت بغرف النوم ، ادري مراح ترحون لان انتو متعرفون غير  اثارة اخر اوراق الطائفية ، وخاف هي محتاجة شوية نار حتى تعلك فحطولها شوية بنزين محسن حتى تشتعل للسما.

شمرت مجلة عمان  من ايدي بعصبية ، لان رحمن  صاح من المطبخ :خلص التشريب شباب والجماعة ملتمين على الدفء والمحبة والذكريات المشوقة ،نتحدث  عن ايام الدراسة وثانوية المصطفى وبورسعيد وقتيبة . عن فلافل المدينة عن مكتبة عباس بن الاحنف وسرقة ثلاثية الاسكندرية ، عن السقوط وماقبل السقوط عن الم العراقيين في التلال الجرداء في عمان الكبرى ، عن الذين مروا من هنا وهاجروا وعن الذين مروا وعادوا الى العراق ،وعن الذين حوسموا هناك واستقروا هنا .

ستاروحاتم  دكو  الباب وجايبين  بطلين عرك حداد وشوية مزة ويعتذرون عن التاخير ، اليوم سكر وغناء وتشريب ونقاش للصبح ،

والله احنا احلى شعب بالعالم .. والله احنا احلى شعب بالعالم ..وانشالله هاي  غيمة سودة وتزول .....

من ارجع احجيلكم شكو ماكو ....

 

shalash70@hotmail.com