http://www.kitabat.com/i12168.htm

14  كانون الثاني 2006

زيارة غير متوقعة لحسون الدنماركي

كتابات - شلش العراقي

 

تتذكرون حسون الدنماركي ، مرة حجيتلكم عنه من اجا للعراق ، اشو هذا هم رجع انوب ،اني مو وصيتكم اخوانا بالدنمارك وكلتلكم لتخلوا يجي ، ليش تيهتوا يمعودين ترى هذا فضيحة مينطلع بيه ، بسرعة  خلي واحد منكم يجي ياخذه ، ترى راح ابتلي بيه .تعالوله خبص الدنيا احنا عايزين قلق صارله جم يوم شلشنا ، طريقنا منندله ،وحتى العملية السياسية راح تخرب من ورا ، وين رئيس حكومة الدنمارك وين جلالة الملكة خل تسمعني ، موعايفة  الدنماركيين دايحين بالشوارع واحنا مبتلين . الله يخيليكم تعالوا اخذوا ، عمي منريده ، لانعرفه ولايعرفنا ، جايبله كاميرا فديوا وتعالوا صوروني بالمراجيح استعيد طفولتي، صعد بالمرجوحة واني اصور والجهال تضحك علينا ، تعالوا صورولي بيت صاحبتي استعيد مراهقتي ، وهو اكبر جذاب سعيدة لا صاحبته ولاتعرفه وين الله خالقة ، ابتلت البنية بي بلوة ، فضحها فضيحة ، مرة متزوجة وعدها جهال ورجلها بجيش المهدي واذا يلكفه يشوي على اذانه بصل .

لا وفوكاها جايني تعال وياي صورني يم الهمر الامريكية ، عبالة الهمر عربانة عمة شبوط الله يرحمه ، هاي شلون مصيبة . انوب يتعيقل علينا ، هاي ليش سواق التكسي يطوطون ، انتو شعب متخلف ،هاي شنو الزبالة انتو شعب وصخ ، هاي ملابسكم عتيكة من البالات ، ليش متفرجون سنونكم ، هسه شعدنا روضة خومو روضة . عمي احنا متخلفين شجابك علينة .روح لكوبنهاكن شتسوي هنا.

والله ايام العيد كلها ما خلاني اشوف طريقي ، شلش تعال وياي للسوك، شلش تعال يمي ضجت ، شلش اشتريلي كاسيت خضير هادي ، شلش جيبلي اغاني ردح في ردح و طربكة، شلش وديني للسدة ارد اسكر هناك، شلش مشتهي فشافيش، شلش تعال نصور الفلوجة واللطيفية للذكرى ،هسة كلها نكول ميخالف ولد متغرب ومحروم ، بس مال شلش تعال دليني على مكتب  اياد علاوي اسلم عليه هاي موخوش حجاية ، يريد يورطني ويا الجماعة . والله بس يسمعون بيّه رايح للوفاق ثاني يوم انطرد من الشغل  ،اخوان يستر عليكم وعلى الدنمارك ، تعالوا اخذوا ابنكم ترى بعد ما اتحمل . لابسله  قبوط اسود ولفاف اسود ونظارات سود وجفوف سود وجنه زرزور ، يركض مثل المرعوص  واني اركض ورا ، اصور بي والناس تصوفر وتصيح علي : ودددددديييي ، هسة هاي وين جانتلي ، انوب عزمته بمطعم الغوطة ارقى مطعم ببغداد  ، يكلي مشتهي شلغم . صدك المعيدي يبقى معيدي يروح يروح ويرجع عل الشلغم . وبالاخير كبل ميسافر اكيد راح يتداين مني ،والله شنو، ماعدي عراقي من اصرف اطيك ، ومثل ذيج المرة يفلت ومحد يدري بيه ،

البارحة تعارك وي الحرس الوطني يكلهم لازم تحترمون الناس وتكولون للمواطن سيدي  ، وبعدين طلع الجواز وكلهم اني دانماركي ، هسة همة نصهم ميقرون وما سامعين حتى بطوزخرماتو ، يا دنمارك يا بطيخ ، ولله لو مو الضابط ابن اوادم جان هسة حسون شامريه جوا

اخوتي  الدنماركيين بعد يومين، اذا محد يجي منكم ياخذه ، بشرفي اسلمه لقوات حفظ النظام . وكلهم هذا من اهل الدورة ويفتر بالليل بالثورة .

متعلمله جم كلمة وجاي يفييك علينا . كل شوية وطكني بجملة : تيك ات ايزي شلش . . . ذبحني ، موتني ، الله يساعد الدنمارك عليه  .

اليوم الصبح دك علي الباب

* ها حسون شتريد

* تعال وياي

* وين ؟

* للمحكمة

* شتسوي بالمحكمة يمشخوط ؟

* ارفع قضية على حجي كامل يكلي انت جنت مطيرجي وسخ ونكري

* روح نام حسون ، يا محكمة المصخمة هاي . بعدين  انت صدك  جنت مطيرجي ليش مستحي .

* تبقون متخلفين وماعدكم كرامة ، احنا بالدنمارك هيج شتيمة ناخذ عليها تعويض مادي ومعنوي ،اخي الكرامة فوق كل شيء والانسا.....

حسون روح اريد اكتب مقالتي  .

 

shalash70@hotmail.com