http://www.kitabat.com/i12054.htm
9 كانون الثاني 6200
عيدكم مبارك وايامكم سعيدة
كتابات - شلش
العراقي
اربي لحيتي
لو ازيّنها ، والله ماادري ،اذا زينتها فلازم يومية اكعد الصبح ادبر شوية مي
وبعدين احمّي المي واكعد اجلطها واسويها مسطاحة مثل الصحاف ، واذا ربيتها
راح اصير اشبه الجماعة ،وخاف خديجة المعلمة تكوم تكرهني ، والله حيرة.
اللحية
مشكلة معقدة ، لو يومية تضربها موس وتطلع جديد بالباكيت ، لو تتركها وتطلع
حشاك جنك صخل ،.
* شلش هاي
شبيك ؟ هسة خلصت مشاكلك وما باقي غير لحيتك ؟ زيّنها عيني زيّنها، باجر عيد والناس
فرحانة ، على الاقل الناس تصبّح بوجه شوية بي خير.
* زين زين
راح ازينها لتصيحين .
زينّت لحيتي
وطلعت لراس الشارع ، الناس شوية مرتاحة ، ورايحين وجايين للسوك . الرواتب زينة
وميت الف دينار مكرمة من الجعفري الله يوفقه هم رحمة جبيرة ، الناس اشترت ملابس،
من شارع فلسطين ،و من شارع الخيام ، وقسم من سوك الاولى، وبعضهم اكتفى بملابس
العيد الماضي ، شبيها والله جديدة ، الخيول العربية الاصيلة تحررت من عربات النفط
واستعدت لجولات العيد حيث يفضلها المراهقون في الركوب على المطايا ، كما نصبت
اعواد المناشق في الساحات ، يا مشانق شلش هاي مال المراجيح ، شبيك سكرت ؟
كما وضعت
بعض السكرابات الدائرية في تقاطعات الشوارع ، لتشكل غدا العابا دائرية للاطفال ،
وهذه الالعاب مع المطايا مع الخيول مع العربات التي ينحشر فيها الصغار هي العابنا
التي تستنزف عيدياتنا منذ سنوات طويلة ،ويمكنني القول ان كريمة بت الحجي
التي سترافق ابنها الى الساحة غدا ، كانت قبل سنوات هي شخصيا تلعب وتمرح بنفس
الالعاب ، الوجوه تغيرت والدنيا تبدلت ووالت ديزني مالتنا هي هي .
مدينة
الالعاب قريبة من الثورة ، بل نحن اقرب مدينة اليها، ولكنها مكان غير امن للصغار
لذلك فهي حصة الشباب وبعض المراهقين الذين سيحملون الاتهم الموسيقية الايقاعية
ويملؤنها صخبا جميلا . الالعاب قديمة وغالية نوع ما ، والجديد فيها هو ما استهلك
في مدن الجوار و استورده الاخوة التجار من اجل عراق فقير .(بالمناسبة اخوان
اذا واحد عاجبة يروح لمدينة الالعاب ويركب الصحن الطائرمجانا، ترى شناوة عمي يشتغل
هناك بس كلولة شلش يسلم عليك وهو يركبكم ، والله هو كَلي خل جماعتك بس يجون
ويتدللون ).
الدنيا
باردة ، باردة كلش ، والاخوان في كندا يكتبون لي ان الثلج غطى شوارعهم ، اقول لهم
ان برد العجوز هنا يسوي الاذان حمرة مثل شيف ركي ، والظلمة وية البرد ، تصعد
الكاّبة للسما. ولو ما العرَك متوفر صدكوني جان عبد الرضا وعباس وجعفر وحمزة
انتحروا، شبيكم اهل كندا تتباجون ، على الاقل عدكم كهرباء وماي وانتخابات بدون
مشاكل .
البارحة
الجو جان احسن شوية ، ولو مطرت، بس شوية احسن . بس بالليل تصير
باردة تموت ، ومسكين جبار ابن الشرطي يحب يسرى البصراوية ويوكف بالركن يباوع على
بيتهم ، بلكي تطلع تذب الزبالة ويشوفها، جبار ميت من البرد ويسرى مكَابلة الصوبة ،
مسكين جبار بعده مصدك بالحب ، شكد قديم ، عمي يا حب يا قنادر ، حتى الحب صار ما بي
طعم ، صار مسجات ومسكولات واهداءات على قناة روتانا .روح اخوية جبار، روح اكعد
بالبيت ما طول اكو كهرباء ودزلك جم مسج لقناة الديار اكتب بي :
* فروم ذي
صن اوف البوليس مان ، الى ليفت البصراوية شوكت راح تحسين بيه ؟
وداعتك هسة
يسرى تقرا المسج وتجاوبك ،
* سودة
عليه جبوري وداعتك اليوم ماكو زبالة ، حبيبتك ي . س . ر . ى
بعد شتحبون
احجيلكم ، اريد اخلص المقال بدون سياسة ، لان السياسة متفيد ، اولا: لان محد يقرا
وثانيا : حتى اليقرون طلعوا يضحكون علينا ، والله فد مسئول كلش جبير ، كلش كلش
جبير ، كتبلي ايميل يكلي شلش بشرفك لاتقطع كتاباتك ، ترى اني هواية متونس عليها
ويومية اموت من الضحك . طلع شلش يضحّك المسئولين ، واني فرحان عبالي من اكتب ثاني
يوم ميطلعون بالتفلزيون يستحون .اضحكوا عيني اضحكوا ، مو اني مضحكة مال الهلافيت ،
يجيكم يوم ، شكد تكدرون تقشمرون الناس ؟ يجيكم يوم .
ادري نصكم
راح ترجعون لاهلكم بلندن وايران والهملايا ، خاصة الدكتور موفق الربيعي ،اول واحد
راح يشطح ، وكَولوا شلش كَال، اذا موفق الربيعي بقى بالعراق اني مو شلش . تدرون
ليش ؟ لان الاخ الدكتور ضرب ضربته ليكدام ، اول ما وصل العراق باع معامل
التصنيع العسكري تفصيخ لايران وقبض ملايين من الدولارات ، وبعدين اخذ حصته
من شركة (ام تي سي)، وهاي الحجاية مو من جيبي ، حتى مام جلال يعرفها .مام
جلال بشرفك وانت محامي متجذب وابن اوادم ،كلامي مو صحيح ؟ اذا جذب اسحب
جنسيتي وسفرني لنيوزلندا والله اتقبلها منك بروح رياضية وما ازعل ، دخيلك سفرني ،
ابوس ايدك مو طكت روحي.
اكلكم هو
موفق الربيعي ليش الامريكان يحبوا وعينوا مستشار للامن القومي طيلة مدة بقاءه في
العراق ، وليش السيد السيستاني هم يحبه ، بحيث شوكت ميريد يطب عليه بدون موعد وليش
كلهم يخافون منه .
هذا شلون
رتبها ؟ لو هي مرتبة من اول واحنا مندري ؟ كلشي يصير بهل الدنيا .
بس مع ذلك
اني احب موفق الربيعي ، لان على الاقل يضحك ، والوحيد هو يعرف من اين تؤكل كتف
العراق . ملعون موفق كلها من جوة راسك .اضحك ابو الويو * هاي شنو موكلنا
منحجي سياسة ,
* يالله بس
على الدكتور موفق ، مراح نحجي على غيره . الرجال لاسيّد ولا اية الله ، مسموح الحجي
عليه . بس على كيفكم ، شوية شوية ..
موفق
بشرفك ، الله يوفق اخوك بالصفقة الجديدة ، بعد لتقرا مقالاتي وتضحك ، ترى
اني ابو ابوية محروك وانت تضحك .هاي تاليها صرنا مضحكة لشعيط ومعيط ، الله كريم
موفق لو دامت لبرزان ما وصلت اليك ...
هاي شلون
كاّبة . وجمالة بعد شوية راح تنكطع الكهرباء . شتكولون اخواني الكنديين اروح
يم الشباب الط فد نص عرك لو اوكف بالركن يم العاشق الولهان جبار ابن الشرطي ، بلكي
تطلع خدوج وتسلم علي . والله نعال خدوجة يسوى ابو .....
عيدكم مبارك
وايامكم سعيدة وكل عام انتم والعراق بخير ، نلتقيكم بعد العيد .