http://www.kitabat.com/i14458.htm
17
آذار 6200
طلعت بالتلفزيون
كتابات - شلش
العراقي
ها ام حسين
شفتيني اليوم بالتلفزيون ، اي والله طلعت مرتين ، اني ابو القميص
الابيض المخطط ، جنت امشي ورا كاكا برهم صالح من طلع يحجي بالتلفزيون
، ومن خلص كاكا برهم رحت سلمت عليه وكتله شلونك كاكا ، عاشت ايدك على هذا الكلام ،
الحقيقة اني ما سمعت كاكا برهم شجان يحجي ، بس كلت ميخالف خليني اتلّوك شوية
، هي ظلت علية ، اشوه كلها تتلوك للحكيم وللطلباني وحاجم الحسني وغيرهم ،
بس بيني
وبينج ام حسين ، كاكا برهم خوش كردي ، احسن من غيره ، وما اريد اجيب اسماء
..انت تعرفيهم ،
كاكا برهم
يحجي بلغة عراقية ، ويتحدث بهم وطني ، صحيح اني ما ادري شكو بكلبه ، بس الظاهر هو
زين ، احسن من ذاك الرجال ، انت تعرفيه ماكو داعي اجيب اسمه ، عرفتيه ام حسين ؟
خلي يولي من جيب اسمه .
وهناك بقصر
المؤتمرات ، شفت كل السادة اعضاء مجلس النواب المحترمين ، سلمت على قسم منهم ،
وقسم ماكدرت لان يمشون مثل صدام ، وراهم الف واحد يركض ،وشايفين حالهم شوفة .
تدرين ام
حسين اغلبهم ميستحقون الاحترام ، والله لو تشوفيهم من قريب ، فد وجوه متسوى قندرة
، كلت بكلبي صدك .. جذب ، ذوله يحكمون العراق ، وجماله خربوه ودمروه
بتفاهتهم ، وجوه حاقدة على نفسها لاسياسين ولاالهم اي علاقة بالسياسة ، بس شنسوي
للحظ اللي جابهم وحطهم فوك روسنا ، قسم منهم عملاء ما لهم علاقة بالعراق ،
وقسم لصوص وقسم دجالين وقسم عدهم شعور بالنقص يموتون على الكاميرات ، وقسم
منهم هم عملاء وهم لصوص وهم دجالين وهم عدهم شعور بالنقص ، وللامانة اكو جم واحد
خطية محروك كلبهم على العراق والعراقيين ، بس محد يعبرهم ،مسكين اليحب العراق صار
مكروه
ام حسين ليش
هيج حظنا ، احنا موعدنا اكبر شريحة مثقفة بالمنطقة وعدنا علماء وخبراء ومختصين
تارسين دول العالم ، ليش الله وكعنا بهاي الحثالة ليش ؟ . ....
اني من طلعت
بالتلفزيون ، كلت راح تشوفني ام حسين ، واتمنى شفتيني ، لان جيرانه اتصلوا بيا
وكالوا شلش شفناك ، صاير جبير وتطلع بالتفلزيون ، ومخلصها بقصر المؤتمرات ،
حتى خديجة شافتني بس ضوجتني ، تكلي انت ماعندك غير هذا القميص يومية لابسه ،
شسوي ام حسين ، منين اجيب قابل ابوك ، خو ما ابوك ، تريدني خدوجة اصير حرامي مثل
السياسيين خلصوها بوك وسرقات ونهب ، لا والله اني استحي ، استحي ابوك واستحي
امد ايدي لدول الجوار واستحي اخذ رشوة واستحي حتى اطلب جكارة ، ما ادري ليش هاي
الناس متستحي ، وين راح الخجل ام حسين ؟، جان العراقي يستحي من خياله ، ليش
هسه صرنا منستحي وصار الحرامي والمرتشي والعميل يتباهى ، والقاتل صار محترم وفوكاها
يسموا معالي الوزير ، والكذاب يبوسون ايده ويكولوله مولانه الجليل بركاتك
علينا ، . . .
ما اريد
اطول عليج ، بس اريد ابشرج ، لان سمعت بعض السياسيين كالوا راح نتفق ونشكل حكومة
وطنية ، كلت يارب انشا الله ، لان العراق كلش تعبان ومتالم وميستاهل هذا العذاب ،
واحنا العراقيين حتى بعد مابينه حيل نبجي ، والله كلوبنا خلصت من القهر ، العراق
عزيز علينا ، وماصدكنا يخلص من صدام وكعنا بمصيبة جديدة ، مصيبة كشرة ، مجلس
النواب الموقر خلصها اليوم قصائد وخطابات واكاذيب والناس يومية تموت والجثث ترست
المجاري ،
يالله ام حسين
الله كريم لتبجين ، الله اكبر من المجرمين ،
تصبحين على
خير.