24 شباط 2011

علي بابا والاربعين برج

كتابات - شلش العراقي

اخوان، عندي طلب بسيط، وأعرف مَتقصّرون!

باجر ورا المظاهرات، محتاج كم واحد منكم يجون وياي للمنطقة الخضراء.

خطية الحكومة مضيعين أربعين مليار دولار، اي والله البارحة سمعت اسامة النجيفي يكول عدنا اربعين مليار دولار امريكي مصيرها مجهول وكاعد اندوّر عليها!

فتعالوا وياي نساعد الحكومة، وبلكي نلكاها! حرام ترى هاي فلوس مال ايتام، اي والله، مال ايتام وارامل ومساكين ومُهجرين ومُهاجرين، بس الحكومة ضيعتها! حكومة ثولة، كل ما نحط ابيدهم شي يضيعوا، إنطيناهم أصواتنا ضيعوها، إنطيناهم ثقتنا ضيعوها، إنطيناهم العراق ضيّعوا. متكلي بعد شننطيهم؟ شبيكم؟ ثولان خو مو ثولان؟ اكو واحد يضيّع اربعين مليار دولار؟ صح، هو مبلغ بسيط و تافه ولا يساوي غير ميزانية اربع دول مجتمعة هي سوريا والاردن واليمن والبحرين! نمونة، قحط، مشايفين؟ هي اربعين مليار!

شلش، ليش تضخّم الامور؟ انت ليش تسوي الحبة كُـبّة، اربعين مليار! فدوة لقندرة حسن السنيد. الفلوس وسخ دنيا، مو هيج دكتور صالح المطلك؟ والله شعرة بلحية خالد العطية تسوى عندي ميتين مليار دولار. بس مع ذلك خل ندّورها! حرام، اموال يتامى وارامل، اموال شعب مسكين، بناته وابنائه صاروا ملطشة بدول الجوار. تعالوا نفتش عليها، يمكن حطيتوها بمكان ونسيتوا، دوروا جيوبكم زين، إتذكروا! خاف دفنتوها بحديقة القصر. يمكن بمطبخ المالكي. يمكن فوك الكنتور، جوا القنفة، يمكن بالحمام او فوك السطح او ورا الباب، دوّروها متروح! مال حلال، واذا مالكيتوها فِدوة إلكم! بس مرة ثانية إنتبهوا، الله وصى بالامانة، وإنتوا الحمد لله كلكم تخافون الله، كلكم تخافون الله، وكل يوم ابراهيم الجعفري بالبرلمان يفسر لكم معاني الآيات البيّنات من محكم الايات الكريم، هو يفسر، وصفية السهيل تحجي بالتلفون! هو يفسر، واكو واحد كردي، ما اعرف اسمه، ميّت من الضحك! اي والله اني شفتهم بعيني! حتى جانوا يناقشون الميزانية.

وبعدين لِمن حسبوا الدخل، طِلعت اربعين مليار دولار ماكو! وين صارت ؟ مَحد يدري. كلها سكته، بس هم زين راح يشكلون لجنة تحقيقية!

اعلى برج بالعالم، كما تقول قناة العربية هو برج دبي، بلغت تكلفته مليار دولار، وكما تقول القناة ان البرج الاعلى و الافخم في العالم والمزود بكافة وسائل الراحة والاستجمام والخدمات ويشكل مدينة متكاملة يسكنه 100 الف شخص، ينعمون باخر ما توصلت اليه البشرية من وسائل راحة.

واذا حكومتنا كانت شوية شريفة وبَنَت بهذا المبلغ المفقود اربعين برج مثل برج دبي، كان صار عدنا اربعين مدينة متطوره يسكنها اربعة ملايين عراقي.

جان اهل الثورة والشعلة والمحمودية وابو غريب والفضل والعبيدي والحسينية والكمالية وسبع قصور وحي اور وابو غريب وحي الجهاد والمتجاوزين والحواسم والمُشردين والمُهجّرين، جان كلهم ساكنين بهاي الابراج، وجان واحدهم هسة نافخ ريشه وميعترف بالمحافظ.

هم زين الحكومة ضيّعت المبلغ، والله الحكومة تفتهم! ضيّعت المبلغ.

جان صرنا علي بابا والاربعين بُرج. جان شخلصنا اذا اهل الشعلة كاعدين بالطابق الستين ويشوفونا من فوك ويضحكون علينا؟

جبار اللبّاخ، من فوك البرج، يصيح على مرته : تعالي سعيدة، تعالي هنا، باوعي على الشارع. دتشوفين ذاك الولد اليمشي وايده بجيبه؟ وينه وينه ما اشوفه؟ شبيج عمية، ذاك اليمشي يم الشجرة! اي اي شفته، شبي خطية؟ لج هذا شلش العراقي. عرفته من قميصه ومشيته! تضحك سعيدة من كل كلبها وتكول : شلش ابو الكلك، لو يموت ميصير براسه خير. شجابه هنا شيسوي يم برجنا؟ شوف الناس وين وصلت وهو بعده ماخذ الشوارع رايح جاي! إنشالله إتطك عليه عبوة ونخلص من هاي الشكولات المزعجة.

سعيدة ورجلها، بعد ما شبعوا ضحك ، نزلوا للمسبح شوية يرتاحون. اليوم الشمس، حلوة وسعيدة محتاجة تسوي برونزاج، اي والله تسوي برونزاج! اني شفتها وحتى صورتها بالتليفون، والله هاي مو احلام. شبيكم، إنطوني اربعين مليار، واذا بعد شفتوا وجهي آني مو شلش.

والله سعيدة وبدرية وصبيحة وإسراء وخدوجة، حبيبة روحي, كلهن يستاهلن حياة افضل من برج دبي وافضل من كل ابراج الدنيا، لو بس شوية الحكومة متضيع فلوسنا، لو بس شوية الحكومة تكول عيب ظلمناهم بما يكفي، لو بس الحكومة تصير حكومة، بس للأسف هو حظنا ويا من كعد؟ والله ماعدنا حظ!

ذاك صرف فلوسنا على الاسلحة والحروب والقصور الرئاسية، واجوا ذولة، مهروش وطاح بكروش، ما صدكوا شافوا دولارات، صدك حيتان، مثل ما كال الكربلائي، باكو الاكو والماكو، حتى الحصة باكوها .

المهم اخواتي العراقيات اخواني العراقيين، فلوسكم راحت، ومستقبل اولادكم راح ، وبلدكم على وشك ان يصير شيء من الماضي.

هاي الحكومة مو حكومة، هاي زبالة حشاكم! اكو حكومة بالعالم تضيّع اربعين مليار دولار وتكول لشعبها إصبروا سنة واني اجيبلكم الكهرباء، واذا متصبرون، انتوا بعثيين ومأجورين وعملاء ومدسوسين ومرتبطين باجندة خارجية،

روحوا بعد خمسين سنة متشوفون شي! كما يقول خضير الخزاعي.

آني شخصياً أصبر، اذا كلولي وين الاربعين مليار، وباجر رايح للمظاهرات أطالب بحصتي من الاربعين مليار، ولو اني ما شفت شي من ال 300 مليار السابقة! بس ميخالف، الفات مات .

راح أتظاهر باجر، وابقى أتظاهر حتى إقالة الفاسدين، أولهم ثلاثي بغداد المرح الزيدي وعبد الرزاق والعيساوي!

راح ابقى اتظاهر حتى الحكومة تقدّم استقالتها للبرلمان، ورغم عدم احترامي للبرلمان، بس لازم اكو خطوات شرعية نحترمها حتى لنروح للفوضى. كلشي ولا الفوضى.

تستقيل حكومة، وتتشكل حكومة من جديد بعدد معقول، وباسماء من المختصين والخبراء حصراّ.

رايح أطالب بحقي، وما أسمح لاي شخص يتحدث باسمي، ولا أخلي واحد يسرق صوتي، ترى أكو لصوص يريدون يضحكون علينا مرة ثانية!

لا عيني لا، لا هيئة علماء المجرمين، ولا كلاب الزمن الاسود، ولا اصحاب الثارات الشخصية عدهم حق يختطفون صوتي،

هاي مظاهرة، وكل واحد يعبر عن رأيه، ما أكو احد مسؤول عن احد، وماكو واحد يتحدث باسم احد، افتهمتوا، اشوفكم باجر .

Shalash70@hotmail.com

http://www.facebook.com/shalash.eliraqi