كذبة نيسان

1 نيسان 2011

كتابات - شلش العراقي

شلون واحد يكدر يألف كذبة نيسان بالعراق، صار لي كم يوم محتار، منين اجيب كذبة قوية،،، منين يا ربي؟

المشكلة احنا شعب ما متعودين على الكذب، لانه حرام، واحنا شعب يصدك المسلسلات التركية والمكسيكية، ويعتقد نهاية الافلام الهندية نهاية طبيعية وتنزل دموعنا عليها.

والله خطية اميتاب، عمت عيني عليه، للموت وما عاف حبيبته، شعب نصدك بكل شي. اذا واحد كَال اني سيد، نبوس ايده ونحطها على راسنا، واذا واحد كَال اني رجل دين نشيل قندرته ونحطه كدامه، واذا واحد كًال احنا اكثر بلد بالمنطقة استقراراً من الناحية الامنية، نكَله عاشت ايدك، والله متكَول الا الصدك، واذا واحد كَال اني بحياتي ما جنت بعثي، راساً نكَله صحيح، والله انت بحياتك ما لبست زيتوني، واذا واحد كَال رايح لإيران بس اكمل دراستي وارجع، ندعليه بالنجاح والتوفيق ونحط صورته على الكوسترات والكيات وبراس الشارع، و حتى قاسم عطا، حشاكم، شيكول احنا نصدك، ومرة رئيس الوزراء كَال اسمي جواد المالكي كَلناله طبعا، شنو قابل منعرفك ابو كاظم ، وبعدين كَال لا يابه، طلع اسمي نوري المالكي، كَلناله هاي شنو ابو اسراء؟ اكو واحد ميعرف انت نوري المالكي.

احنا مصدكَين بالدستور، ومصدكَين بالعلمية السياسية، وبالمصالحة الوطنية، وبالشراكة الوطنية، وحتى كالونا انتو طلعتوا مو شعب، انتو مجرد مكوّنات واطياف، واحنة مصدكَين، ومصدكَين راح نصير احسن دولة بالعالم، ومصدكَين ان رفع الزبالة من محلة الشيخ عمر يكلف صابر العيساوي 43 مليار دينار شهرياً، ومصدكَين انه واحد اسمه كامل الزيدي هو افضل شخصية لرئاسة مجلس محافظة بغداد، ومصدكين مام جلال يعمل لمصلحة العراق من كسرة وعطش لبوب الشام، ومصدكَين بصالح المطلك صار نائب لرئيس الوزراء من اجل مستقبل العراق، ومصدكَين بهادي العامري راح يسوي مطارات العراق افضل من مطارات ماليزيا، لانه خبير مطارات وقطارات وانفاق، ومصدكَين كلشي، اي شي تريد تكَوله والله احنا مصدكَين، بس لتحلف! والله مصدكَيك، مصدكَين شهادتك ونعرف انت دكتور. ومصدكَين لحيتك والطمغة بكَصتك، ونعرف انت تقي وورع ودمث ابن دمث وتصلي صلاة الفجر بوضوء صلاة المغرب، وانك تتلو القران اناء الليل واطراف النهار، وان جدك موسى الكاظم، وانك زاهد في الدنيا متوجه بقلب سليم الى الاخرة ..

احنا مصدكَين ، مصدكَين بكل شي، لو ما مصدكين ما إنتخبناكم! شنو إحنا مجانين ننتخب كذابين؟ حشاكم من الكذب!

لا عيني، والله مصدكين، والشعب من يكول: كذّاب نوري المالكي كذّاب، أصلاً الشعب هو أكبر كذاب.

ليش هو منو إنتخب نوري المالكي؟ منو إنتخب خالد العطية؟ منو إنتخب حسن السنيد؟ منو إنتخب علي الدباغ؟ منو إنتخب أياد علاوي؟ منو إنتخب الملايات البحرينيات؟ مو الشعب نفسه؟

الشعب هو ابو المشاكل!

منو دمرنا غير الشعب؟ شعب يصدًك كلشي، حتى اذا اجاهم واحد ياباني وكَلهم اني موسوي، يكَولوله دخيل جدك ابو الجوادين، اللهم صلي على محمد وآل محمد، والله عرفناك مولانا. ماشا الله! حتى اللاب توب مالك اسود. واذا اجاهم واحد بلجيكي ابن بلجيكي وكلهم اني من اهل العمارة، رأسا يصدكَون. اي نعرفك! بيتكم بالمجر يم الفرن. انت مو رجل زهرة بت عليوي وخالتك بدرية؟ تفضل استريح ابو مطشر.

القاهرني هو العراقيين يصدكَون كل الناس، بس شلش العراقي! شيحجي يكَولون جذاب، اكلهم فلوسكم راحت، يكتبولي أسكت جذاب. يابه تره يضحكون عليكم. انجب جذاب، اخوان، ابراهيم الجعفري نصّاب. واحد كتبلي: صه يا رقيع! شسوي؟ صهيت وامري لله.

اختي ام اركان ترى رجلج متزوج عليج، تضحك ام اركان وتكول ابو اركان ميبدلني بجوليا روبرتس، وهو بشرفي متزوج رضية ام الحسابات.

يمعود قاسم قشمروك الجواز يطلع بورقتين، ليش دفعت ست اوراق؟ شلش انت تغار، لان جوازك ما طلع.

يابه بيت ابو حمزة، ابو منتظر نسيبكم مو سيًد، رجال كناني اني اعرف اهله واخو عدنا بالشركة. اسكت عمي متشوف نور محمد بوجهة؟

خالة ام جمعة ابنج بالمجاميع الخاصة ويحط لاصقات بسيارات الناس. تروح لا افلش راسك بالهاون؟ ابني اربع وعشرين ساعة كاعد على الفيس بوك ميطلع لباب الحوش.

وهكذا يستمر ابناء الشعب العراقي في تكذيبي، كلهم يكذبوني، بس صديقي عبد الرضا المسكين، شحجي يصدكَني، وقبل كم يوم خطية سألني: شو ماكو شلش؟ محد يسمع حسك، ظل بالي عليك ؟ كتله يا اخي، إبتليت بلوة، هاي مريام فارس المطربة، بعد حفلة نادي الصيد اجتني للبيت ومتقبل تطلع، واني خايف اهلها يحسًون وتصير مشكله. صفن عبد الرضا ودار راسه شوية وبعدين جاوبني بسرعة: ليش متفلت بيها لسليمانية، وهناك تتزوجها على سنة الله ورسوله؟ ... شتكَولون أسويها وأضرب خديجة بوري لو متسوى؟

Shalash70@hotmail.com

http://www.facebook.com/login/setashome.php?ref=login#!/shalash.eliraqi