بواسير النايب

المؤلف غير معروف

أريد أحچي وخلي الكل يسمعون

جراحة كلفت ستين مليون!!

ليش أوجاع شعبي كلهه أتْهون

وبس النايـب وَجعاتـه چبيرة

لاتلومونه أبدْ نايبنه أبو الغيرهْ

مايگدَرْ ينام الليل وجعنَّه بواسيره

تكشخ نايبنه برقم أغلهْ بواسير

مو هيّن طلعْ لَهلوبة بالتزوير

أظنَّه راد يـلحگ بالـمشـاهـير

وينذاعْ صيتَه بأخبار الجزيرة

لاتلومونه أبد نايبنه أبو الغيرهْ

مايگدَرْ ينام الليل وجعنَّه بواسيرهْ

أشـصارْ شـو عنده خلگْ باسور

أشْـحالْ لـو طگ عدَّه  ناسور

يمكن يفكر يبيع الكرادة والمنصور

لأن تزيد أعليه كلفة ْ التسعيرة

لاتـلومونه أبدْ نايـبنه أبــو الغيرهْ

مايگدَرْ ينام الليل وجعنَّه بواسيره

تخبَّل من وَرهْ ماشافْ هاذ العزْ

چان ياكل بصل وهسه ياكل وزْ

شاف المال سايــب گام يـنگـزْ

عگب ماچان يملك بسْ حصيرة

لاتلومونه أبد نايبنه أبو الغيرهْ

مايگدَرْ ينام الليل وجعنَّه بواسيره

شعليهْ بالشعـب لو نام جـوعانْ

وشعليهْ بالمواطن حافي لو عريان

المهم يظل مرتاح وجيبه مليانْ

ويظل هو السبع حارس الديرة

لاتلومونه أبد نايبنه أبو الغيرهْ

مايگدَرْ ينام الليل وجعنَّه بواسيره

متگـلي أشعـليه بالأنـفجاراتْ

وشعليه بالمواطن عاشْ لو ماتْ

نايبنَه اليهمَّه يشــفطْ النـفطاتْ

مرتاحٍ ينــام ونســمعْ شخيرَه

لاتلومونه أبدْ نايبنه أبو الغيرهْ

مايگدَرْ ينام الليل وجعنَّه بواسيره

يـمكن تـأذه مـن وَرَه الكـرسـي

لازگ بيـه من يصبحْ ويمْسـي

شلون تريده ياشعبي يظل منسي

أيجوز صارت أوضاعه خطيرة

لاتلومونه أبد نايبنه أبو الغيرهْ

مايگدَرْ ينام الليل وجعنَّه بواسيرهْ

گضه عمره العراقي وماله منهوب

ذل وجوع هـذي فـوگ الحروب

گاعـد عالنـفط وخاوي الجيـوب

بصيرَة عيونه بس أيده گصيرة

شَعبي كلَّه يروحْ فدوة لبو الغيرة

ونفطـاتْ الشَعَبْ فدوَة لبـواسيره