10 آذار 2011

كاكا جلال وين جنت

كتابات - شلش العراقي

كاكا جلال ..، كاكا .. مام جلال ... هاي وينك سيادة الرئيس؟ وين صرت؟ دا احجي وياك: شبيك متسمع؟ تسمحلي ادخل؟

آني شلش، عندي شغلة زغيرة وياك. هاي شبيك كاكا، انت سمعتنا جبنا طاريك ،، احد هتف ضدك، كلنا عليك جذاب؟ كل ما في الامر، سمعنا اكو مظاهرات بالسليمانية، ولان منعرف كردي، ماعرفنه شنو القصة، وانت تدري طاسلوجة دولة جارة واحنا دستوريا ممنوع نتدخل بشؤون الجيران، بس سمعنا من التلفزيون أكو بالسليمانية مظاهرات، والبيش مركة والاسايش ماقصروا! ادبتوهم وقتلتوا كم واحد، حتى خطية اكو طفل انقتل بطريقة تدمي القلب. والامور صارت هادئة والحمد لله.

إحنا شعلينا، راساً كلبت علينا، وكمت تصيح كركوك قدس الاكراد، وعينكاوة فاتيكان الاكراد، وكويسنجق حائط المبكى، وبيره مكرون جبل الهيكل، والمنطقة الخضراء ثالث الحرمين.

هاي شنو أبو قباد (اسم المحروس ابن السيد الرئيس ) ،،، انت مو رئيسنا وحامي دستورنا والساهر على وحدة العراق؟

شنو تعالوا ياتركمان، احنا وياكم نضرب العرب جلاق ونطلعهم برة كركوك؟ وين يرحون؟ لداقوق لو قادر كرم؟

عيب كاكا، هذا الكلام عيب ومو مال رئيس دولة؟ بس هي يا دولة؟ لو اكو دولة، جان كلنا ميخالف. لو اكو دولة وبيها رجال، رجال من صدك، جان كلولك ذب العوجية واطلع برّة! يالله روح لدوكان،، بس حشى من يسمع مجموعة خرنكعية.

كركوك، يا كاكا، قدس الاكراد والتركمان والعرب. كركوك ليست مزبلة لمشاكل احزابكم الداخلية. كل متتضايقون، تفتحون باب الجحيم على كركوك. كركوك مدينة للتعايش والاخاء والمحبة، للاكراد والتركمان والعرب والآثوريين ولجميع العراقيين.

كركوك مو المشكلة، كركوك هي الحل، وبس تاخذ حقها من التنمية والتطور، راح يتحدث بيها الاقتصاد وتسكت السياسة، وبدل متورطوها بحروب ومشاكل وصراعات، روحوا إبنوها، إبنوها مام حلال!

خل ابناءها مرة وحدة يشعرون هُمه بشر وابناء مدينة ثرية، وبيها اقدم حقل نفط بالمنطقة.

إبنوها كاكا، إبنوها، مو تبوكوها حرام، كركوك تعبانة ومتهالكة وحزينة وشوارعها كئيبة، طلّعوا البيش مركة وابنوها، بطلوا كلاوات مال قدس الاقداس، هي القدس وراها مليارين مسلم! وينها؟ الله وكليك صار إسمها القدس الشرقية، والشرقية صارت نصين، وحتى أهلها من يريدون يصلّون بالحرم، يعبرون سيطرات اكثر من سيطرات الكرادة!

كاكا جلال، ياسر عرفات مات، وفلسطين ضاعت، وللقدس رب يحميها، وإحنا حاليا بالعراق، وانت بالمنطقة الخضراء، وكركوك تنام على هموم الدنيا، مدينة من المزابل والقمامات والجوع والفقر والبطالة، حتى شارع واحد مبلّط ما بيها، مع ان الاسفلت يطلع من الكاع من قدرة الله. كركوك بيها الغاز يحترك من فجر البشرية وقنينة الغاز صارت حسرة على اهلها. كركوك قرية متخلفة تحتاج رافعات البناء، لا خطابات التهديم، كركوك تحتاج نهضة عمرانية عملاقة مو تصريحات نارية ومزايدات قومية.

صيرعاقل كاكا، صير عاقل، مابينه حيل طلايب، إحنا والاكراد والتركمان أهل واخوان، والرئيس ما يفرق شعبه.

انت لازم، اذا شفتنا شوية متزاعلين، المفروض متنام للصبح حتى تصالحنا، مو انت تصدر مشاكلك الحزبية علينه، وتصب الزيت على النار!

روح اسمع اهلنا بالسليمانية شيردون، وحقق مطاليبهم وإقضي على الفساد والسرقات والاهمال والثرثرة، ولتتعلم من جماعتنا جيرانك بالمنطقة الخضراء، ترى ذولة بطون جاعت ثم شبعت! ذولة حرامية وحيتان وراح يشوفون مصيرهم الاسود .

بعدين، ما كتلي سفرتك للكويت شلونها،، انشالله ناجحة، عاد العزايم والثريد هناك بفلس وانت ومتشتهي، واحنا من وراك علكناها ببغداد وسويناها ظلمة على ابو اسراء، وشرفك سويناه مذيع، اربع وعشرين ساعة بالتلفزيون، طلعنا لساحة التحرير، طبعا مو كل احنا ،، جم الف واحد بس ،، بس اخوك نوري ما خلّه صبة كونكريت تعتب عليه، ومثل الفار ختل وسد الجسور والشوارع ودز كمال الساعدي ،،

يمعود روح اشوف شنو القصة ،، مرعوب ما خله آية ما قراها، حتى دعاء كميل قراه مرتين،، بعدين كام يتوسل، يمعودين إنطوني ١٠٠ يوم بس وشوفوا شراح اسوّي ...

واحنا نهتف: كذاب، ابو اسراء كذاب ،،،

اي والله فاتتك، جان متت من الضحك، وبعد جم يوم هم طلعنا وعلكناها، بس انت هم ماكو، صوجك طوّلت بالكويت، فاتتك! جان يومية تشوف أبو اسراء وتضحك عليه، واذا ماعندك شي هذا الاسبوع تعال لبغداد بِشرفك، تعال للمطعم التركي و شوف ابو سراء شلون بطنه تكوم تمشي ،، مع العلم احنا بعدنا ما طالعين من صدك، بس هو ما ادري شبي، صاير ابو الفزة.

كاكا، اني عندي شغل شوية، ورايح افتح الفيس بوك اشوف شكو ماكو ،،،

بالمناسبة انت مو رئيس جمهورية، تدير بالك تفتح الفيس بوك ، ترى يطك عليك!

Shalash70@hotmail.com

http://www.facebook.com/home.php#!/shalash.eliraqi