http://www.kitabat.com/i11269.htm

20 كانون اول 5200

لنكن مثل شلش لا نرتدي الألوان

كتابات - ماهر اللّطش

اشارة الى ما كتبه شلش العراقي يوم السبت 17 ديسمبر باهمية الأنتظار الى ما ستسفر عنه نتائج الأنتخابات، وقوله هذا لا غبار عليه ولا احتجاج، ولكن مثل هذا الأنتظار عادة ما يحدث في دول آمنة ومستقرة، واحزابها الحاكمة بشر لا يهمهم سوى معالجة مشاكل شعبهم والسعي لأرضائه، وانتخاباتهم لا تحرسها قوات عسكربة ومارينس وضفادع بشرية وطائرات وميليشيات .. وقبل ان ادردش مع شلش الصادق ... اريد  الأشارة الى الكاتب رياض حمامة الذي غضب وحاول الأنتحار بسبب بعض الجلاليق الصوتية التي اصابة احبائه في احد برامج العربان في الجزيرة العربية، فاقول لرياض حمامة { عرب وين وطنبورة وين }، شوفلك غيرها اخي هذا مو ثوبك بلونه الأصلي، .. بس نسيت اسألك خوية رياض حمامة شمِعنا إشتعل حمّامك ؟!

اما اخي شلش فله طعم آخر لأنه صادق ويرتدي ثوبا بلون واحد، ولو يا اخي شلش .. أشِمّن في دعوتك إلنا الأنتظار بيها.. إنّ .. ! لأن نعرفك ما تجذب.. من حيث انت ما تراكضت لأعلان نتائجك الأولية مثل ما ركضوا الجماعة لأظهار نجاحهم المزور على فضائياتهم، ولكن شوف خوية شلش العراقيين مفتحين باللبن، ويعرفون كل دروب الأنتخابات اكثر من فريد ايار، ولكني ابشرك آني استطعت الحصول على ارقام النتائج قبلك، وراح ارسلها إلك بالفاكس بلكي توزعها نشمية على نسوان الطرف  !!

محافظات الشيعة في الجنوب { هيج يسمونها }  فازت بالتِزكية، وبدون تُدُخل ولا اي سيارات مفخخة، لأن الربع حارسينها والناس كلها من خوفها انتخبت هاي وحدة .

محافظات السنة ايضا هيج  يسمونها ... ها يابا  .. حدث فيها نقص فى الأستمارات وقضيتهم مو مهمة لأنهم اعمام الأرهابيين  .

محافظات الأكراد .. وايضا هيج يسمونها ... فازت قوائمهم بالتزكية، لأن منطقتهم مسيجه بأسلاك شائكة والله حتى الجلب مايكدر يطبيلها .

وبهذا نأتي على نهاية برامجنا وننتقل الى فضائيات الحرية لنقول ونحلل ونخرط ونناقش ونتفلسف على شاشاتها وبقيادة المتحدثين الشموع وهم جملة .. للبحث عن كيفية الأئتلافات، لأننا في كل مرحلة يطلع إلنا شي هالنوبة رجعونا التآلفات والتحولوفات  .. وايضا وصلني هذا الخبر من فد خوش ولد يشتغل بالمفوضية الحيلْ مستقلة ..  واحنا بدورنا نشيد باستقلاليته وديمقراطيتها الأمريكية هينوب فيقول ...ان الأنتخابات كانت عرس وحفلة وجوبي وعيد ميلاد وشعلنة شموع حتى شعلتنا. ولو انه كان هناك بعض المخالفات من بعض الزعاطيط فهذه طبيعية حتى في بيوتنا اكو مخالفات، خو البارحة قناة الجزيرة بزرها ... شفتْ شلون خالفت اصول البرنامج لأن الحاضرين ما قالوا {للشمعة} انت منورة الحتة، بلاكت جابوا طاري الشخاط اللي حرك ابو ابو العراقيين، وياهم اشوف الأتجاه المعاكس هم إحترك ! .. والله صح دا يحجي .. والمصيبة الجبيرة اكو كاتب اسما رياض حمامة، خو هذا شك هدومة من سمع الجزيرة تحجي على عمامة كام يلطم يبوييييييي ... الله يساعدا، وما كدرت اعرف لليوم شنو علاقة ابن حمامة بالشموع وبقناة الجزيرة !..

اما المفكر الستراتيجي والخاص بقناة اهل القمل  فيقول .. من اجل العراق الخالي من الأمراض التي تعشعش في بعض اللحاية وبعض العبي .. فيجب الأتفاق على ما يلي ... اما الأكراد يروحون وية الشيعة او السنة يروحون وية الأكراد ويرجعون بعدين، او الشيعة يطبكون وية منو وية منو .. ها.. وية التركمان حتى تقوى القائمة السنية او يجري تخالف، العفو تحالف، بين علاوي وبدر، أهووو العفو مرة ثانية، بين علاوي وبيان، وطبعا هذا شي كلش زين لأنْه اضبط من حيث اذا القائمة الكردية تحالفت وية القائمة الأشورية راح يصير مجال بعدين تقلب عليهم وياخذون كل الحكومة ... وهذا احسن من تحالف قوائم الشيعة  وية الصبة، لأن الصبة حسب آخر تقرير من لجنة النزاهة النزيهة يقول ان الصبة لا ينحدرون من سلالة المراجيعيات، ويضيف مراسلنا وياها شوية بهارات فيقول .. ومن جهة اخرى فان العالم طار عقلا واستغرب بطريقة انتخابات العراق ..

والله عجيب العالم هم كام يجذب.. انتو شايفين انتخابات تجري في بلد طامس بالمشاكل وبدون امان وممنوع التجول خمسة ايام وشرطة وجيش وحرس وطني وقزرقط وانذار جيم بالفضائيات وطائرات استطلاع ومراقبة الحدود ودبابات في الشوارع وهجمان بيوت واجتماع مجلس الأمن، وخنجر وشناوة ودعبول مخبوصين بالنفط والكهرباء والماي، والتزوير صاعد نازل والتريلات داخلة وطالعة من جهة شرجنا ؟..

وكل هذا يحدث في العراق ومايكل جاكسون وكوفي يغني وبوش يهلهل وكرزاي يكول والله جانت انزه من انتخابات افغانستان ... خو ملكة بريطانيا بقامتها تخبلت وكالت لازم أزورن الحكيم بنص بيتا وابوسن حلكة وعباتة خمس بوسات،, يبووووي و يمة انلاصت .... دخل الكفر البيتنا ؟!...

عِمتْ عينكم! اي والله عِمتْ عينكم على هالجذب .. المهم اسمع شلش: كل العالم الديمغراطي قال بانها انتخابات 100% ديمقراطية وشفافة وناجحة .. وبلكي احنا غلط .. خوي شلش آني معلية بيك رايح اشوف قصة رياض حمامة شينهي؟ اشو هذا مجان هيج! شنوا اخاف سحروا الجماعة وقلب على جماعتا ...

مقالة الأستاذ شلش العراقي

http://www.kitabat.com/i11215.htm

مقالة الأستاذ رياض حمامة .

http://www.ankawa.com/forum/index.php/topic,21317.0.html