7 آذار 2011

يوم ندم ملطّخ بالسواد

كتابات - شلش العراقي

في السابع من اذار الماضي، كعدت من غبشة الله، بدون ما امشط واتريك، رحت اركض مثل المجنون للمركز الانتخابي، فرحان لوثت ايدي بحبر بنفسجي، ومن كل عقلي كلت راح يتغير الوضع، طلعت مضروب اكبر بوري.

قشمرتوني، اي والله قشمرتوني، وهاي مو أول مرة ينضحك علي، قشمرتوني لان كلبي طيب وعلى نياتي، قشمرتوني لان جنت خايف من الارهاب، خايف من ميلشيات الله ومن حزب الله ومن ضيم الله, فشمرتوني لان حطيتوا الله ومحمد وعلي والحسن والحسين والعباس والزهرة وام البنين بيناتنا، قشمرتوني لان رفعتوا شعار دولة القانون، قشمرتوني باسم البناء والاعمار والخدمات والصحة والتعليم والمترو وجنرال الكتريك وسيمنس وماي ومجاري وتبليط وحدايق ومدارس وعشرة في عشرة.

تقشمرت من شفت العمايم السودة والبيضة تتزاحم على قنوات التلفزيون، تقشمرت بالعكل والغتر واليشاميغ، تقشمرت بالقوط والربطات، تقشمرت بالملايات وعباياتهن وجفوف ايدهن.

قشمروني بالمحابس والسبح واللحى الشرعية، قشمروني بالطكعة السودة على كصتهم، وكلت هاي سيماهم على وجوههم من اثر السجود, قشمروني باسم المظلومية ورفع الحيف وانهاء المعادلة الظالمة، قشمروني ان المراجع العظام وياهم, والمراجع نواب الامام المهدي والامام المهدي صاحب الزمان، قشمروني، حياتك راح تصير جنة، وبغداد راح تصير طوكيو.

وباختصار ايها السادة النواب قشمرتوني لان اني قشمر، والله اني اكبر قشمر وكمش عالتيغة, انعميت مدري انثولت، مدري انسطرت، ما ادري شجاني، حتى ما قريت اسماءكم ولا دققت بوجوهكم، لو شوية مدقق، جان شفت الحقد والكراهية واللؤم والمرض والخبث والدناءة والفجور والدهاء والمكر والنصب والخديعة والرخص والابتذال والقذارة والمهانة والتبعية والشهوة والشراهة والنهم والانحطاط الاخلاقي وضعّة النفس وهوانها والنذالة والخسّة واضحة وضوح الشمس. بس للاسف استعجلت، خفت تنفجر مفخخة واروح بيها.

ايتها النعجات، ايها الخرفان : هل حقا انتم ممثلي الشعب العراقي؟ ايتها الخنزيرات، ايها الخنازير هل حقا ان حضيرتكم الرطبة هي قبة برلمان الشعب؟ ايتها السحليات، ايها السحالي، هل حقا انتم صوت الشعب العراقي، ايتها اللصات، ايها اللصوص، ايتها النشالات، ايها النشالون،ايتها النكريات، ايها النكرية، ايتها العلاسات، ايها العلاسون، ايتها الصكاكات، ايها الصكاكون، ايها المزورات، ايها المزورون، هل فعلا انتم حراس المال وبيت المال؟

ايتها البزونات العاوية، ايها العتاوي المعوقة، ايتها القمامات، ايها البراميل هل انتم عراقيون؟

هل انتم والبقرات الثولات تشكلون نخبة المجتمع؟ وهل انتم من خرجنا من اجلهم ولوثنا اصابعنا بحبر التزوير؟

هل خرجنا نتحدى الارهابيين من اجل انتخاب الحرامية؟

يالعارنا، يا لسواد وجوهنا، يا لطيحان حظنا .

اني نادم يا وطني، اني نادم ياعراق، نادم يا ناس، نادم ياعالم، اعرف غلطتي جبيرة والله اعرف,

اني نادم يا جدتي لانني قلت لك، وانت المريضة العليلة، تعالي ننتخبهم, ومشيتي معي بظهرك المحني تجرين تعب السنين المرّة، نادم ياجارتي العلوية عندما قلت لك الانتخاب واجب وطني وشرعي، نادم يا اصدقائي عندما لم احترم رغبتكم ودفعتكم لصناديق الزور، اني نادم يا ام علي، ونادم يا ابو ستار, ونادم يا حجي اسماعيل ونادم يا ام خضير, ونادم يا زاير قاسم، ونادم يا ام نورية، ونادم يا ابو رزاق، ونادم يا سيد راهي ونادم يا حسون المعاق، نادم يا عبوسي، ونادم ياهل الحي، نادم والله نادم، اعذروني لان دكيت ابوابكم مثل غراب البين اتوسل بيكم اطلعوا،, نادم لان ورطتكم بالعرس الديمقراطي! بس والله اني مثلكم صدقت الجذاب الجبير راح يسوي دولة قانون، شمدريني، اشتم ايدي؟

اهنيكم يا مجلس النواب، اهنيكم لانكم بعد عام ما شكلتوا حكومة، وبعد ثمن شهور من الرواتب والامتيازات والمقاولات والحجات والزيارات والصلوات على محمد, افتتحتم البرلمان بجلسة مفتوحة خرقا للدستور، حتى لو مدحت المحمود كال ماكو خرق، اهنيكم ايها الخراف التي ترفع ايديها بعد اتفاق رؤوس العصابة او رؤوساء الكتل، ما هي قيمة اصواتكم؟

اذا علاوي يوقع مع المالكي بحضور البرزاني اتفاقا لا تعرفون شيئا عن محتواه، وبعد ساعتين من التوقيع ترفعون ايديكم بالاجماع كالفئران المذعورة، ماقيمة اصواتكم وشنو سبب وجودكم وشنو الفايدة منكم؟ بعدين تعالوا، منو انتوا؟ وين جنتو؟ ماهي اسماؤكم الثلاثية؟ وشنو تحصيلكم الدراسي؟ وين سجلاتكم الجنائية ومن اي سراديب طلعتوا علينا؟

خرابة صارت بغداد, تنعق بيها الغربان، تلال من المزابل تتكدس مثل لحاكم الكريهة على ارصفة الشوارع، خرابة مثل ارواحكم بغداد، كئيب مثل وجوهكم صار وجه بغداد، فاسد مثل أرواحكم صار هواء بغداد، قاحلة مثل عقولكم صارت حدائق بغداد، مريضة مثل نفوسكم روح بغداد، خاوية مثل افكاركم مدارس بغداد، دجلة بوجودكم مكب نفايات، والفرات، الفرات يمكن مات.

آني نادم، و باجر وبعد سنة من غلطتي، راح اصخّم اصبعي الي انتخبكم وتلوث بكتابة اسمائكم، آني نادم وكل اهلي وجيراني واصدقائي نادمين، نادمين وراح نلون اصابعنا بالسواد، باجر شوفوا اصابعنا، كل احنا باجر انحنـّي اصابعنا بالسواد، ومن عكب باجر راح نسوي كل ايامكم سودة ومصخمة ،، ضحكتوا علينا مو، إجه دورنا.

Shalash70@hotmail.com

http://www.facebook.com/home.php#!/shalash.eliraqi

ملاحظة : من المؤكد ان السيد جعفر محمد باقر الصدر والعضوات والاعضاء الذين وقفوا مع مظاهراتنا وقفة واضحة وصريحة غير معنيين بهذا الانفعال .