http://www.kitabat.com/i14594.htm
21 آذار 2006
الى أخي شلش مع التحية
كتابات - علي حسن السعدي
عزيزي
.. لا أعتقد انني أجيد الكتابة باللهجة العامية العراقية (الحسجة) ولم أجربها يوما
, لكنني متابع لما تكتبه , فأردت اليوم ان أدخل هذا المضمار عسى وان يكون النجاح
من نصيبي .
أنت
كلت اجم مرة وشحرجت حته إنبَح حسك , كلت يابه ترة قوات بدر تاخذ مصيرفهة من ايران
لكن محد صدكك وهاي القوات هيّ اللي تحكم البصرة والناصرية والعمارة ومدينة الثورة
بالاتفاق مع جيش المهدي , واليوم يعلن السيّد ومثل ما يسمونه الناس (الفقيه
المعيّن للعراق) عن اتعابه (المخلصة) للصلح بين ايران وامريكا ( روح الهوه بظهرك)
ومثل ما يكولون (يم حسين جنتي بوحده صرتي بثنين) , خايب شلش هذا اعتراف ما ينرادله
دليل طلع صاحبنة مو مسنود بس من ايران طلع طركاعة سودة تسندة ايران وامريكا خايب
بعد عليمن تكتب ومتعب نفسك والماي يجي من كدامك واللطميات وصلت للموبايلات بعد ما
صفّت الكيّات حتى يصير العراق بلد الحزن اللي ميقبل بيه امامنا الحسين (ع)
.
خوية
شلش من اسمعت بهذا الخبر رحت ركض لصديقي جورج اشتري ربع عرك مسيّح حتى انسة هاي
المصيبة السودة , وجورج ــ أمانة الله ــ من يشوفني من بعيد يحضر ربع العرك ويخليه
بعلاكة كبل ما أوصله , لكن اليوم خوية شلش ــ ولا يهونون الجماعة ــ شفت جورج
مرتبك ويأشر بعينة حتى لا أطب بالمحل , انه ما درت بال وطبيت لكيت واحد لابس
دشداشة سودة وعندة لحية ولابس بأديه ثمن محابس يسب بجورج ويشتمه وجورج خطية ساكت ,
دخلت وسلمت عليهم وكلت لبو دشداشة السودة بوية على كيفك اتهدة بالرحمن الدنية ما
تسوة هاي العركة وضيجة الخلك , انت شسمك يا أخي كال انه اسمي مهدي , كتلة عاشت
الاسامي يا أبو صالح الورد شنو القضية استريح واحجي , كعد ابو صالح وهو يمتع نظره
بانواع المشروبات الاجنبية , انطيته جكارة وكتلة هسه احجي اللي بكلبك وانه مثل
اخوك , كال ابوصالح تقبل يا خوية ابو حسين هذا الرجال يبيع عرك وهو حرام , كتلة
خوية ابو صالح هذا الرجال مسيحي وكلمن يمشي على دينه اليهود يمشون علتوراة والمسيح
علأنجيل واحنة علقرآن فجورج يبيع العرك لأن مو حرام بدينهم , كللي ابو حسين انت
شيعي وآنة اعتز بيك ليش كمت تحجي فلسفة والانجيل والتوراة وانة من القرعان ما حافظ
غير الحمدو وقلهوالله , وبعدين ياابوصالح نروح للدستور العراقي يكول كل عراقي
يتمتع بحريتة , ضحك ابو صالح من كل كلبه وكال : ليش لبالك السادة زواج وميعرفون ,
كالوا كل واحد ياخذ حريته (على ان لايتعارض مع الاسلام) والعرك يتعارض مع الاسلام
يالله هسه عزّل جورج لا أنسفك بقاذفة ترة حوسمنة كل عتاد الجيش السابق وبعنة من
عندة شكد للامريكان وباقي خير من الله . وآنة شيكولون السادة انفذه حتى لو على كص
ركبتي , كالوا العنترنيت حرام كمنة وكسرناهن كلهن وما خلينة شي يكولون عنة تقدم ,
يالله جورج عزّل بساع لآن عندي بعد شغلة اريد اروح اكتل فد بنية بالكرادة تمشي
سافرة كدام الناس متستحي , كتله بوية ابو صالح حط رجليك بالكاع وتهدة بالرحمن انت
وجورج اليوم معزومين عندي لأن اهلي راحو الكرايبهم وأخليك تتونس اليوم ونسة ممتازة
واصالحك وية هذا الرجال الحباب جورج وراح تشوفة شلون رجال اتحطة بكلبك , لكن ابو
صالح ما قبل وكال هذا حرام , لحيت عليه شوية تختخ وقبل , رحنة للبيت وجورج جابنة
ويسكي درجة اولى وبدينة نشرب ونسولف على الدنية وطلايبهة لكن ابو صالح كام يشرب
كله جعب الى ان سكر كلش , رحت فوك السطح ودرت القمرعلاوربي وكام يشوف الطراكيع
والمصايب الى ان فقد ابو صالح ونام , الصبح جبناله ريوك كباب وانطيناه مصرف وكام
يعتذر من جورج وكلة فتّح وأي واحد يوكف بعرضتك كللي , انة ما ادري هيج العرك يونس
مقشمرينة الجماعة بالكبسول (سخت ايران) يكولون هذا ينشطك بالعمليات , انشّع ساعة
وبعدين يروح مفعولة اثاري جذب يردون يكربون علينة , وبعدين (وكبل) ميودعنة ابو
صالح كال : بعض الناس تريد تروح للنار الوادم شعليهة؟
ها
خوية شلش شلونّي .
19/3/2006