قصيدة
شعبية من قلم:
سمير عبيد
((كَالو
صبر خل نكتب
الدستور))
أجيال
أجيال
عشنا
ثلث عشرات
إبظلم
و
الدستور
مارسناه
لكن.. بالحلم
وكان
اليعترض
السابع ظهر..
ينثرم
وبالبنكة
شهر يفتر... ينبرم
ومانعرف
من الوطن
غير
الريّس
والعلم!
**
ثلث
عشرات
وكَبلها
وبعدها
ماعرفنه
إحكَوك
بس
نقدّم واجبات
مثل
الطفل من يلعب
أمحيبس
ما
يعرف غير جلمة
(عندي
المحبس هذا
بات)
لحروب
الأفندية
سوق
الغنم ننساق
ولو
نرد ننزف
لو
ملفوفين
إبعلم
بيه ثلث
نجمات
**
وشرّدونه
أبليل
والمدفع
يحصد بالعزاز
وصار
شغل الحجّي
يفتر
علمآتم
والصبح
يشتغل جنّاز
أيودع
محمد
ويدفن
أمحيسن
ويشتري
أجفان من ظاهر
البزاّز
***
وبو
صيبع
كَام
بالجُملة
يحفر يخالي
إلحود
ويوقع
بالأمن
يتعهد
ما ينطي العدد
والمعدود
وينسى أجساد
الشباب
ويتخيلهم
جراد ودود
كلشي
أيهون
ما
دام القائد
يظل
موجود
**
ظلمونا
وصبرنا
وكّمنا
أزغارنا
وكبار
والغاية
موش الحكم
ولا
الغاية
بالمضيف
إتشب نار
إنريد
العدل يسري
وبس
نريد السماح
إبّوسة
علي الكرار
وبس
نطبخ قيمة
إحسين
وتجي
العِزيات
من كوت
وشارع العشار
ليش
الظلم
ليش
المنع
ليش
القتل
ليش
إتغار؟
وليش
بكَلوب
الإمهات
إشعلت نار؟
وشفت
تالي إشصار؟
سويت
الوطن منخل
خليت
الوطن للفار
**
عاقبونا
وشرّدونا
إبصحرا وجبال
وعلى
شربة ماي
كتلونه
البدو
وشتّتونه
عللخلك يا خال
وبالوادي
تِطشّر شملنا
وصار
الشعب
عطــّال
وضاع
الوطن
والناس
ماتت جوع
والقائد
يكَول إحنه
أبطـــــــــــــــــــال
***
وغيّمت
دنيا الوطن
والغيرة
طافت بالرجال
وكَلنا
خلص
راح
الحزن
وجانه
موسم راحة
البـــــــــــــــال
وكَلنا
من الظلم
خلّصنا
ومبارك
على أوجاغ
المضيف
وصفّة
إدلال
ولن
أبو إخميّس
يعنعس
بالعراق
الغزال
ولن
السياسة إبلا
ضبط
وعفاط
وخبّال
وجتفوا
كل شريف
اليحجي
إبشدّة
إحبال
وصار
السياسي
على خرج
الوطن دلاّل
وبيّن
المومن دغش
يهذي
وساحر ودجّال
وصار
العراقي
أبفلس
سعره
وين
إنروح ياخال
وعدمن
نشكي الحال؟
****
وهم
صبرنا..
وكَلنا
باجر تتشكل
حكومه
ونرد
نرتاح
لنها
تطارد كل شريف
وبكل
بيت صار إنياح
ولملم
إجروده
وشرد كل فلاح
عاف
الوطن
والكاع
وبعالي
الصوت عمك صاح
حسافة
إعللوطن
مغصوب
وبن
الوطن ماعنده
إسلاح
ماريد
الوطن ينداس
خل
أشرد
ما
ريد أشتم هوا
وأرتاح
**
مجلس
حكمهم
إجه
و راح
ماورّث
غير الطلايب
فرّق
الخوان عكّب
ماكانوا
حبايب
وتعّب
شعبنه
أزغارها
وكبّار
وخلّه
الطفل تعبان
و يحس
شايب
وحوّل
عراق الخير
لطلال
وخرايب
وذّل
العجيد
الحِيد
وشيّخ
الناقص وسايب
***
وجت
حكومتهم أم نص
سنة
وكًلنه
بلكي فرج
تالي
إنكّلبت آفة
وباكّت
الخزنة
والخِرج
وما
شفنه شي
غير
البرتقاله
إودك إوغنج
ونكشف
فيلم السيادة
ولسه
يحكمنا العِلج
***
وكَالوا
الضيم إنتهى
وجايه
إنتخابات
والمحتل
يروح إبعيد
ونرفع
الرايات
وتقشمرت
كالمعتاد
مناطقنا
وعشايرنا
وبدت
آهات
كعدوا
بالمنطقة
الخضرة
وعافوها
الولايات
وصار
الموت
بالجملة
والزلم
تتخنّك
أبلوريات
أما
الموت صاير
بالمزاج
وعلى
النيّات
ويستّر
الله يعمي
من
الليالي
السود جايات
***
كّالوا
صبر
لتضجون..
لتعتبون
على الفترة
الإنتقالية
إصبرو..
النفط
راح إيزود
والبنزين
راح إيعود
والمي
ما يبقى مسدود
وفد
سنه الكهرباء
ترد إردود
وصبروا
ولتموتون
جايتكم فترة
برتقالية
إنتخبوا
هلمرة
الشمعة
الإرجوانية
راح
أيصير الفرح
والخير
وراح
أتغرّد أسراب
الطير
لتعتبون
علفترة
الإنتقالية
***
وكَالوا
صبر خل نكتب
الدستور
بيه
إحلول
بيه
أفراح
ويضمن
حقوق الفِلح
والعمال
والناطور
وصبرنا
ونطرنا
طلّت
الحلوين
إبلجنة
الدستور
وفرحنه
وكّنه
الفرج لاح..
وعلكَنه
عودان البخور
وكنّه
خلاص الظلام
وبالنفق
صاير نور
وهز
ركَبته
عضو
لجنة الدستور
وهتف
مبروك
إنتهت
مسدوة
الدستور
وكتبتها
الجرايد
لنها
طلاسم كَشر
بين السطور
**
بيها
العراق إمفتت
على الأحزاب
وبيها
الوطن مهروس
وصاير كباب
والثروات
متوزعه بيه
علأجناب
وحصة
عجم راح إيصير
كَبرك يسيّاب
***
مسودة
غدر
مو
دستور يا ناس
معقوله
نسكت
علمكَص
والفاس؟
ومعقوله
يتجسم هالوطن
وتبقى
العكَل
علراس؟
ومعقوله
تتسيّج كربلا
ونزور
إبفيزا
العباس؟
ومعقوله
نخسر وطن
وتراب
وتراث ومكتبة
وقرطاس؟
لا
ياناس
لا
ياناس
لا
ياناس
إنموت
كلنّا إنموت
لجل
إلعراق
ونكَطع
أيد التحرّك
ساس
واليصوّت
على دستور
الغلط
مشكولة
ذمته
وعليه
الحسن
والعباس.
27/8/2005